بینیت په کابل او مزار کې د وروستيو بریدونو د څېړلو غوښتنه وکړ

د افغانستان لپاره د ملګرو ملتونو سازمان د بشري حقونو ځانګړي راپور ورکوونکي ویلي، چې په کابل او مزارشریف کې وروستي بریدونه باید په خپلواک او بشپړ ډول وڅېړل شي.

د افغانستان لپاره د ملګرو ملتونو سازمان د بشري حقونو ځانګړي راپور ورکوونکي ریچارډ بنت په یوه ټویټ کې په افغانستان کې د ترهګرو بریدونو د دوام په هکله د اندېښنې په څرګندولو سره ویلي، چې د کابل او مزارشریف په وروستیو بریدونو کې لږ تر لږه ۱۶ ماشومان وژل شوي دي.

د افغانستان لپاره د ملګرو ملتونو سازمان د بشري حقونو ځانګړي راپور ورکوونکي په خپل ټویټ کې ویلي، چې هغه د وروستیو او نورو بریدونو په اړه بشپړو، خپلواکو او سرچینو لرونکو پلټنو ته اړتیا لري.

 بلخوا افغانستان کې د ملګرو ملتونو د ماشومانو د ملاتړ صندوق مسوول ویلي، چې تېرو دوو ورځو کې کابل او بلخ کې ۱۶ ماشومان وژل شوي دي.

افغانستان کې د یونیسف مسوول محمد اګ ایویا په یوه ټویټ کې د ماشومانو پر وژل کېدو اندېښنه څرګنده کړې او ویلي یې دي، چې په افغانستان کې باید د ماشومان پر وړاندې تاوتریخوالی ودرول شي.

هغه زیاته کړه  چې تېرو دوو ورځو کې ۱۶ ماشومان په کابل او بلخ کې او یو بل په روزګان کې د ماین چاودنې له امله مړه شوي دي.

هغه د دغو ماشومانو له کورنیو سره د همدردۍ تر څنګ ویلي، چې ماشومان باید د لویانو د نښتو تاوان ورنه کړي او تل باید خوندي وي.

وړمه ورځ بیا د کورنیو چارو وزارت ویاند عبدالنافع ټکور په یو ویډیو پېغام کې وروستي بریدونه د بشر ضد عمل وباله او ډاډ یې وکړه چې ددې بریدونو تنظیموونکی به ډېر ژر ونیول شي.