د ۱۹ کلنو کرېکټ نړيوال جام نيمه پایلوبه کې انګلنډ له افغانستان څخه خپله سيالي په ۱۵ منډو وګټله.
انګلنډ د نننۍ لوبې پچه وکټله او لومړی يې د منډو جوړولو پرېکړه وکړه چې په ټاکلو ۴۷ اورونو کې يې د شبږو لوبغاړو په سوځېدو سره ۲۳۱ منډې جوړې کړې چې په ځواب کې افغانستان ۲۱۵ منډې وکړې.
د افغانستان لپاره نور احمد دوې، نويد ځدراڼ دوې، ننګيالي خروټي او اظهار الحق يوه يوه وېکټه واخيسته.
د انګلنډ جورج بېل ۵۶، الېکس هارټن ۵۳ او جورج تامس۵۰ منډې ترسره کړې.
د افغانستان لپاره الله نور تر ټولو ډېرې (۶۰) منډې وکړې. د ده تر څنګ محمد اسحاق ۴۳، عبدالهادي ۳۷، بلال احمد ۳۳ او نور احمد ۲۵ منډې وکړې.
د عکس سرچینه،ACB
په نننۍ لوبه کې افغان لوبډله د سليمان ساپي په مشرۍ سيالۍ ته وتلې. د ده تر څنګ الله نور، بلال احمد، اسحاق محمدي، ننګيالی خروټی، نور احمد، بلال سميع، اعجاز احمدزی، اظهار الحق او نويد ځدراڼ شامل دي.
افغان لوبډلې له سرېلنکا نه د لوبې له ګټلو وروسته نیمه پایلوبې یا سیمې فاینل ته لاره ومونده.
د افغان لوبډلې مشر روزونکي رئیس احمدزي هیله څرګنده کړې چې لوبډله به یې له انګلستان سره په نیمه پایلوبه یا سیمي فاینل کې ښه لوبه مینه والو ته وړاندې کړي.
د عکس سرچینه،GETTY IMAGES
تر دې وړاندې افغان لوبډلې د جنورۍ پر ۲۲ مه زمبابوې ته په ۱۰۹ منډو ماتې ورکړه او له دې سره يې منځلوبو يا کوارټر فاينل ته لار ومونده.
افغان لوبډلې د نړیوال جام سایلو په ترڅ کې له پاپوا نیوګیني او زمبابوې نه لوبې ګټلې خو له پاکستان سره یې لوبه وبایلوده.
افغانستان چې په سي ( C) ګروپ کې ځای درلود په ځنډ د رسېدو او د نړيوال جام د قرنطين محدويتونو پر اساس يې لومړنۍ سيالي چې ټاکل شوې وه د جنورۍ مياشتې پر ۱۶ ترسره شي وځنډېده، له انګلنډ او اماراتو سره د چمتووالي لوبې هم ترې پاتې شوې دي.
